ಕವಿತೆ

ಮನದಲ್ಲಿ ಇಂದೇಕೋ

ತಳಮಳ ಕ್ಷಣಗಳು

ಎಂದೋ ಒಂದು ದಿನ

ಎಲ್ಲೋ ನೋಡಿದ

ಸುಂದರಿಯ ಅಸ್ಪಷ್ಟ ಚಿತ್ರ

ಮತ್ತೆ ಮತ್ತೆ ಮೂಡುತಿದೆ

ಅವಳಿಗೂ ನನಗೂ

ಯಾವುದೇ ಸಂಬಂಧವಿಲ್ಲ

ಅನುಬಂಧವಿಲ್ಲ, ಬಂಧವೂ ಇಲ್ಲ

ರಾಗ-ದ್ವೇಷಗಳ ಭಾವನೆಯಿಲ್ಲ

ಆದರೂ ಕಾಡುತಿದೆ

ಅವಳ ನೆನಪು

ನೀರವ ರಾತ್ರಿಯಲಿ

ಸುರಿವ ಮಳೆಯಲ್ಲಿ

ಕೋಲ್ಮಿಂಚಿನಂತೆ ಗೋಚರಿಸಿ

ಮರುಕ್ಷಣವೇ ಮರೆಯಾದ

ಅವರ ಹೆಸರು, ಊರು-ಕೇರಿ

ಯಾವುದೂ ಅರಿಯದು ಎನ್ನ ಮನ

ಕೃಷ್ಣ ಸುಂದರಿಯ

ತುಂಟ ನಗು, ಓರೆ ನೋಟ

ವೈಯಾರದ ನಡೆ

ಬಳುಕುವ ಸೊಂಟ

ಮತ್ತೆ-ಮತ್ತೆ ಮನದಲ್ಲಿ

ಮೂಡಿದೆ ಇಂದು

ಸಂತೆಯಲ್ಲೋ, ಜಾತ್ರೆಯಲ್ಲೋ

ಬಸ್ ನಿಲ್ದಾಣದಲ್ಲೋ

ಯಾವ ತಾಣವದು

ಅವಳ ಭೇಟಿಯಾದದ್ದು

ಎಂಬ ತಲೆಬುಡದ ಅರಿವಿಲ್ಲದಿದ್ದರೂ

ಕಾಡುತಿದೆ ಅವಳ ನೆನಪು

ತಲೆಬರಹವಿಲ್ಲದ ಕವಿತೆಯಂತೆ