Sunday, October 2, 2011

ಸಖೀಗೀತ

ಸಖೀ....
ಒಂದು ಮುಗುಳ್ನಗೆಯ
ಮುನ್ನುಡಿಯಿಂದ
ಪಿಸುಮಾತು ಆಡುತ್ತಾ
ಮಾತಿಗೊಂದು ಮಾತು
ನಡುವೆ ಹುಸಿಮುನಿಸು, ಕೋಪ
ಕೀಟಲೆ ಮಾಡುತ್ತ
ಸುತ್ತಲೂ ಚುಕ್ಕೆಗಳನಿಟ್ಟು
ನಿನ್ನಿಷ್ಟದಂತೆ ಚುಕ್ಕಿಗಳ ಜೋಡಿಸಿ
ರೇಖೆಗಳನೆಳೆಯುತ್ತಾ
ಮನಸವನ್ನು ಆವರಿಸಿ
ಹೃದಯದೊಳಗೆ ಇಳಿದಾಗಲೇ
ಅರಿವಾಗಿದ್ದು ನನಗೆ
ನಿನ್ನ ಪ್ರೀತಿಯ ರಂಗೋಲಿ
ಚಕ್ರವ್ಯೂಹದಂತೆ
ನನ್ನ ಬದುಕೆಲ್ಲವನ್ನೂ ಆವರಿಸಿ
ಸುತ್ತುವರೆದಿದೆ ಎಂದು...


ನೀನಿಟ್ಟ ಚುಕ್ಕಿಗಳ
ಮೋಡಿಯಲಿ ಮೈಮರೆತು
ನಿನ್ನಿಷ್ಟಕ್ಕೆ ತಲೆದೂಗುತ್ತಾ
ನಿನ್ನ ರಂಗೋಲಿಯ
ಲಕ್ಷ್ಮಣ ರೇಖೆಯನು ದಾಟಲಾರದೇ
ನನ್ನತನವನೆಲ್ಲಾ ಮರೆತು
ನಿನ್ನಲಿ ನಾನೇ ಕಳೆದುಹೋದರೂ
ಅರಿವಾಗಲಿಲ್ಲವೆನಗೆ

ಪ್ರೀತಿ-ಪ್ರೇಮದ ನೋವು
ಹಿತವಾಗಿದೆ ಎಂಬುದಕ್ಕೆ
ನಿನ್ನ ಹೃದಯದಲಿ ಬಂಧಿಯಾಗಿರುವ
ಪಾರತಂತ್ರ್ಯವೇ ಸಮ್ಮತಿ
ಈ ಮನಕೆ....