Saturday, April 29, 2017

ಸಖೀ ಗೀತ



ಇದು ಕವಿತೆಯಲ್ಲಾ
ಅವಳ
ಇರುವಿಕೆಯ ಗೈರುಹಾಜರಿಗೆ 
ಸಾಕ್ಷಿ ಮಾತ್ರ


ಪ್ರೇಮದನುಭಾವದಲಿ
ತನ್ಮಯವಾಗಿ ತನ್ನಿರವನ್ನೇ ಮರೆತು
ಕಳೆದುಹೋಗಿರುವಾ ಕವಿ
ವಿರಹದಾ ಬೇಗುದಿಯಲಿ ಮೈಮರೆತು
ಬರೆದ ಸಾಲುಗಳೆಲ್ಲಾ
"ಪಲ್ಲವಿ"ಯಲ್ಲಿಯೇ ಲೀನವಾಗಿ
"ಚರಣ"ಗಳು
ಪ್ರೇಮಿಯ ಶರಣಾಗತಿಯ ಸೂಚಿಸುವುದು
ಅವಳ ಗೈರುಹಾಜರಿಗೆ
ಸಾಕ್ಷಿ ಮಾತ್ರ

ಅದೋ ನೋಡಿ
ಅರುಣೋದಯಡಿ ಅರಳಿದಾ ಮಲ್ಲಿಗೆ
ಆ ದೇವನ ಪೂಜೆಗೂ ಸಲ್ಲದೆ
ಅವಳ ಮುಡಿಗೂ ಏರದೆ
ಬಳ್ಳಿಯಲ್ಲಿಯೇ ಬಾಡಿ ಉದುರಿ
ಧರಾಶಾಹಿಯಾಗಿರುವುದು
ಅವಳ ಗೈರುಹಾಜರಿಗೆ
ಸಾಕ್ಷಿ ಮಾತ್ರ

ಏಕಾಂತದಲಿ, ಜನಜಂಗುಳಿಯಲಿ
ಅವಳ ನೆನಪುಗಳ ದಾಳಿಗೆ ಸಿಲುಕಿ, ನಲುಗಿ
ಕಾರಣವಿಲ್ಲದೆ ಮೊಗದಲಿ ಮಂದಹಾಸ ಬೀರಿ
ಮರುಕ್ಷಣದಲ್ಲಿಯೇ
ವ್ಯಗ್ರನಾಗಿ ಹುಬ್ಬುಗಳ ಗಂಟಿಕ್ಕಿ
ಅನ್ಯಮನಸ್ಕತೆಯಿಂದಾ
ತನ್ನಿರವನ್ನೇ ಮರೆತು ಮೈಮರೆತು
ಶೂನ್ಯದಲಿ ಅವಳ ಪ್ರತಿರೂಪ ಕಾಣುವುದು
ಅವಳ ಗೈರುಹಾಜರಿಗೆ
ಸಾಕ್ಷಿ ಮಾತ್ರ

Thursday, January 12, 2017

ವಕ್ರೀಭವನ

ಏನು ನೋಡಿದ್ರೂ
ಕಾಣಿಸಿರುವದಕ್ಕಿಂತ
ಗ್ರಹಿಸಿದ್ದೇ ಬೇರೆ
ಅದಕ್ಕೇ
ಯಾಕೋ-ಏನೋ
ದೃಷ್ಟಿ ಮತ್ತು ದೃಷ್ಟಿಕೋನಕ್ಕೂ
ಸಮಾಗಮವಾಗುತ್ತಿಲ್ಲಾ

ಶರಧಿಯ
ಆ ಬದಿಯಲ್ಲಿ
ಮುಳುಗುತ್ತಿರುವ ಸೂರ್ಯ
ಆತ್ಮಹತ್ಯೆ ಮಾಡಿಕೊಳ್ಳುತ್ತಿರುವಂತೆ 
ಒಮ್ಮೊಮ್ಮೆ ಕಂಡರೆ
ಅದೇ ದೃಶ್ಯ 
ದಿನವೆಲ್ಲ ದುಡಿದ ದಿನಕರ
ದಣಿವಾರಿಕೊಳ್ಳಲು ಅಭ್ಯಂಗಕ್ಕಾಗಿ
ನೀರಿಗಿಳಿದಂತೆಯೂ
ಒಮ್ಮೊಮ್ಮೆ ಭಾವ ಮೊಳೆಯುತ್ತದೆ...........

ಅದು ಯಾಕೆ
ಸೂತಕದ ಮನೆಯ ದುಃಖ
ನಮಗೆ ತಟ್ಟುವದಿಲ್ಲಾ
ನಾನು ಹೇಳುವುದು ವಕ್ರೀಭವನವೇ ಕಾರಣ
ಏಕೆಂದರೇ.....
ಅವರ ನೋವು
ನನ್ನ ಮನದಲ್ಲಿ ಪ್ರತಿಫಲಿಸುವುದೇ ಇಲ್ಲಾ

ನಿಮಗೆ ಗೊತ್ತಾ
ಹಾದಿ-ಬೀದಿ ಅಲೆದು
ಭಿಕ್ಷೆ ಬೇಡಿ
ಹಲವರ ಕೈಗುಣವ ಸವಿದು
ಸಂತೃಪ್ತಿಯಿಂದ ತೇಗುವ 
ಭಿಕ್ಷುಕನ ಹಸಿವು
ಪಂಚತಾರಾ ಹೋಟೆಲುಗಳ ಭಕ್ಷ್ಯಗಳ
ಸವಿದರೂ
ಸ್ವಾದವನರಿಯದ ನಮ್ಮ 
ಹಸಿವಿನಲ್ಲಿ ಮೂಡುವುದೇ ಇಲ್ಲಾ
ಮತ್ತದೇ ಕಾರಣ
ನಮ್ಮ ದೃಷ್ಟಿ ಮತ್ತು ದೃಷ್ಟಿಕೋನ
ಹಾಗೂ ವಕ್ರೀಭವನ..............

Saturday, October 3, 2015

ಏನೋ ತೋಚಿದ್ದು

ಈಗೀಗ
ನನಗರಿವಿಲ್ಲದಂತೆ
ಪ್ರವಾದಿಯೊಬ್ಬ
ನನ್ನಂತರಾಳದಲಿ
ಅವತರಿಸುತ್ತಾನೆ

ನನ್ನಂತರಂಗದ ಕೊಳೆ
ಕಳೆದುಬಿಡುವನೆಂದು
ನನಗೂ ಒಂಥರಾ ಖುಷಿಯೇ
ಆದರೇ....
ಅವನೋ ಆಗಾಗ
ರಾಜಕಾರಣಿಯಂತೆ
ಕಾರಣವಿಲ್ಲದೇ
ಬೊಗಳೆ ಬಿಡುತ್ತಾನೆ

ಹಿಂದೊಮ್ಮೆ ಓದಿರುವ
ಅವರಿವರಲ್ಲಿ ಕೇಳಿರುವ
ಸದ್ವಿಚಾರಗಳ ತುತ್ತೂರಿಯನ್ನು
ಒಂದಿನಿತು
ಜೋರಾಗಿಯೇ ಊದುತ್ತಾನೆ
ನನ್ನೊಳಗೆ
ಬಿತ್ತಿ ಬೆಳೆಸಬೇಕಾಗಿರುವ
ವಿಚಾರಗಳನೆಲ್ಲ
ಅವನು
ಅಲ್ಲಲ್ಲಿ ಎರಚಲು
ಹೊಂಚುಹಾಕುತ್ತಾನೆ

ನನಗೋ
ತೆರೆದುಕೊಳ್ಳುವ ಹಂಬಲ
ಪಾಚಿಗಟ್ಟಿದ ಕೊಳೆಯನ್ನು
ತೊಳೆದುಕೊಳ್ಳುವ ಹಂಬಲ
ಆದರೇನು
ಅವನು ಎನ್ನ ಬಾಯಿಗೆ
ಕೆಲಸಕೊಟ್ಟು
ಕಣ್ಣು, ಕಿವಿಯನ್ನು ಮುಚ್ಚಿದ್ದಾನೆ
ಎನ್ನೊಳಗಿನ ದುರ್ಘಂಧವನು
ಸಹಿಸದೇ
ಅವನು ಈಗೀಗ
ಮೂಗು ಮುಚ್ಚಿಕೊಂಡು
ಹಗಲಿರುಳೂ
ಪ್ರವಚನ ನೀಡುತ್ತಿದ್ದಾನೆ.......

ನನ್ನತನಕ್ಕೆ ತೆಳುವಾದ
ತೆರೆಯೆಳೆದು
ಅಂತರಾಳದಿ ಅವತರಿಸಿದ ಪ್ರವಾದಿ
ಜಗವ ಬೆಳಗುವ
ಹುಂಬತನದ ಹಂಬಲ ಮೆರೆಯುತ್ತಿದ್ದಾನೆ....

Saturday, August 15, 2015

ಕನವರಿಕೆ

ಸುಮ್ಮನೇ
ಅತ್ತಿತ್ತ ಚಲಿಸುವ
ನಯನಗಳು
ಕಾಣುವ ನೋಟ
ಮನದಲ್ಲಿ ಮೂಡದು
ಮನದಲ್ಲಿಯ ಚಿತ್ರಣ
ನೋಟದಲ್ಲಿ ಕಾಣದು
ಅವಳು
ಅಲ್ಲಿ ಇಲ್ಲವೆಂಬುದು
ಅರಿತೂ
ಮತ್ತೆ ಮತ್ತೆ ಇಣುಕಿ
ನೋಡುವ ನಯನಗಳು

ಮನದಲ್ಲಿ ಮಂಥನ
ಅವಳೊಡನೆ ಒಡನಾಟ
ಎಲ್ಲವನೂ ಅರಿತ
ಮನಸುಗಳು
ಅರ್ಥವಿಲ್ಲದ ಮಾತುಗಳು
ಆಗಾಗ ಮುಂಗುರುಳ
ಸರಿಸುವ
ಅವಳ ಕೈಬೆರಳು
ಕಣ್ಣೆದುರು ಅವಳಿಲ್ಲವಲ್ಲ
ಅಂತರಾಳದ ಚಿತ್ರಕೆ
ಅಳಿವಿಲ್ಲವಲ್ಲ

ಮನದಲ್ಲೇ
ಮುದಗೊಳಿಸುವ
ಅವಳ ಸುಳಿದಾಟದ
ಭ್ರಮೆಯ ಕಂಪು
ಕನವರಿಕೆಯಲ್ಲಿಯೂ
ಕೇಳುತ್ತಿರುವ
ಅವಳ ಕಾಲ್ಗೆಜ್ಜೆ,
ಕೈಬಳೆಗಳ ಸದ್ದು
ಕಣ್ಣೆದುರು ಇರದಿದ್ದರೇನಂತೆ
ಅಳಿಯಲಾರದು
ಅಂತರಂಗದ ಮಂಥನ

ನಿರೀಕ್ಷೆ

ಸಖೀ...
ನಾನು ನಿರೀಕ್ಷಿಸುತ್ತಿದ್ದೇನೆ
ನಮ್ಮಿಬ್ಬರ ಮಿಲನವನ್ನು
ಬರಗೆಟ್ಟವನಂತೆ ಕಾಯುತ್ತಿದ್ದೇನೆ
ನಿನ್ನ ಬರವನ್ನು....

ಮನಸು ಕಲ್ಲಾಗಿಸಿ
ನಮ್ಮ ಪ್ರೀತಿಗೆ ಕವಚ ತೊಡಿಸಿ
ಕಾಯುತ್ತಿದ್ದೇನೆ ನಾನು
ಶಾಪಗ್ರಸ್ಥ ಅಹಲ್ಯೆಯಂತೆ....

ನಿನ್ನೊಂದಿಗೆ ಕಳೆದಿರುವ ಕ್ಷಣಗಳ
ಸವಿನೆನಪುಗಳಲಿ ಲೀನವಾಗಿ
ಕಾಯುತ್ತಿದ್ದೇನೆ ನಾನು
ಅಶೋಕವನದ ಸೀತೆಯಂತೆ....

ಕಾಲಚಕ್ರದಡಿ ಹಣ್ಣಾಗಿ
ನನ್ನತನ ಕ್ಷಣ-ಕ್ಷಣವೂ ಕರಗಿಹೋಗಿ
ಹೃನ್ಮಗಳಲಿ ನಿನ್ನನ್ನೇ ಹೊತ್ತು
ಕಾಯುತ್ತಿದ್ದೇನೆ ನಾನು ಶಬರಿಯಂತೆ....

ಸಖೀ....
ನಿನ್ನನ್ನು ನನ್ನೊಳಗೇ ಅವಿತಿಟ್ಟುಕೊಂಡು
ಕಳೆದುಹೋಗಿರುವ ನನ್ನನು
ನಿನ್ನ ಕಣ್ಣಾಲಿಗಳಲಿ ಕಾಣಲು
ನಾನು ಕಾಯುತ್ತಿದ್ದೇನೆ ನಿನಗಾಗಿ...

ವಿದಾಯ

ಸಖೀ....
ಒಲುಮೆಯಾ
ಮಿಲನವೊಂದು ಮುಗಿದು
ಪ್ರತಿಬಾರಿ ನೀನು
ನಿರ್ಗಮಿಸಿದಾಗಲೂ
ಶೂನ್ಯದತ್ತಲೇ
ಎನ್ನ ಗಮನ...

"ಏನಾಯ್ತು, ಹೀಗೇಕೆ"
ಎಲ್ಲರಾ ಕಳವಳದ ಮಾತು
ಗಾಯವಿಲ್ಲಾ
ನೋವಿನಾ ಗುರುತಿಲ್ಲಾ
ಪೇಲವ ನಗೆಯೊಂದೇ
ಎನ್ನ ಉತ್ತರಾ....

ಪ್ರತಿ ಇರುಳಿನ
ಎನ್ನ ಏಕಾಂತದಲಿ
ಎಲ್ಲಿಹಳು ಎನ್ನವಳು
ಎಂಬ ಪ್ರಶ್ನೆಯೊಡನೆ
ಮನದ ಭಿತ್ತಿಯಲಿ
ಮೂಡುವಾ ನಿನ್ನ ಪ್ರತಿಬಿಂಬ...

ವಿದಾಯದೊಂದಿಗೆ
ಕೊನೆಗೊಳ್ಳುವಾ
ನಮ್ಮ ಮಿಲನಗಳು....
ಪುನರ್ಮಿಲಕೆ
ಮುನ್ನುಡಿಯಾಗಲಿ
ನಮ್ಮ ವಿದಾಯಗಳು....

ಆತ್ಮಸಾಕ್ಷಿ


ಶ್ !!!
ಸ್ವಲ್ಪ ಸಹನೆಯಿಂದಿರಿ
ನಾಲ್ಕಾರು ನಿಮಿಷ
ಮೌನವಾಗಿ
ನಿಮ್ಮೊಳಗೆ ಅಡಗಿರುವ
ನಿಮ್ಮ ಆತ್ಮ
ಉಲಿವುದನೂ ಕೇಳಿ

ಬೋಧಿಸುವುದ ನಿಲ್ಲಿಸಿ
ಮರುಳು ಮಾಡುವ
ವಾಗ್ಬಾಣಗಳಿಗೆ ವಿರಾಮ ನೀಡಿ
ಪಾಂಡಿತ್ಯ, ಬಿರುದುಗಳ
ಕಳಚಿ
ನಿಮ್ಮತನದ ಪ್ರತಿಬಿಂಬ ನೋಡಿ

ಎಡ-ಬಲಗಳ ಮೀರಿ
ಹಾಡುಹಗಲೇ ಇರುಳನ್ನು ಹೊದ್ದ
ನೊಂದವರ
ಒಂದರೆಕ್ಷಣ ನೋಡಿ
ಅವರ ಬಾಳಿಕೆ ಬೆಳಕು ನೀಡಿ
ಇಲ್ಲವಾರದೇ
ಪಕ್ಕಕ್ಕೆ ಸರಿದು ಅವರನ್ನು ಸಾಗಲು ಬಿಡಿ

ದಯವಿಲ್ಲದ ನಿಮ್ಮ
ಧಾರ್ಮಿಕತೆಯ ಕತೆಗಳ
ಮೂಲೆಗಿಡಿ ಗಂಟು-ಮೂಟೆ ಕಟ್ಟಿ
ಹಸಿದವರ ಮುಂದೆ
ಉಲಿಯುವಾ ನಿಮ್ಮ ಪ್ರವಚನಕೆ
ಒಂದಿನಿತು ವಿರಾಮ ನೀಡಿ
ಹಸಿವು ತಣಿಸಬಹುದಾದರೂ
ಕಾಮಾಲೆ ಕಣ್ಣುಗಳ
ಪೊರೆಯ ಹರಿದು ಹಾಕಿ

ಶ್ !!!
ಸ್ವಲ್ಪ ಮೌನವಹಿಸಿ
ವಾಗ್ವಾದಗಳ ನಡುವೆ
ನಿಮ್ಮ ಗಮನಕ್ಕೆ ಬಾರದೇ
ಕೊನೆಯುಸಿರೆಳೆದ ಆತ್ಮಗಳಿಗೆ
ಚಿರಶಾಂತಿ ಕೋರಿ
ಅರೆ ನಿಮಿಷ ಕಣ್ಣು ಮುಚ್ಚಿ
ನಿಮ್ಮ ಪ್ರತಿಬಿಂಬವ
ನೀವೇ ನೋಡಿ.......

ಸಖೀ ಗೀತ

ಇದು ಕವಿತೆಯಲ್ಲಾ ಅವಳ ಇರುವಿಕೆಯ ಗೈರುಹಾಜರಿಗೆ  ಸಾಕ್ಷಿ ಮಾತ್ರ ಪ್ರೇಮದನುಭಾವದಲಿ ತನ್ಮಯವಾಗಿ ತನ್ನಿರವನ್ನೇ ಮರೆತು ಕಳೆದುಹೋಗಿರುವಾ ಕವಿ ವಿರಹದಾ ಬೇಗುದ...