ಜಾತಿ-ಬೇಧಗಳ ಮೀರಿ ....

ಅದೇ ತಾನೇ
ಜನ್ಮಪಡೆದು
ಅಚ್ಚರಿಯ ಕಂಗಳಲಿ
ಜಗವ ನೋಡುತಿರುವ
ಹಸುಳೆಯನು ಕಂಡು
ಹೇಳಲಾಗದು
ಜಾತಿ, ಕುಲ ಗೋತ್ರಗಳನು

ನಸುನಗುವ ಹಸುಳೆಯೂ
ಅರಿಯದು
ತಾನು ರಾಮನೋ, ರಹೀಮನೋ
ಅಥವಾ ಬೇರೆ ಇನ್ಯಾರೋ....
ಎಂಬುದನು

ಮರಣಗೊಂಡು
ಪಂಚಭೂತಗಳಲ್ಲಿ ಮತ್ತು
ಮಣ್ಣಿನಲಿ ಲೀನವಾದ
ಮಹನೀಯರೆಲ್ಲ
ಅಸ್ಥಿಗಳನು ಅಗೆದು ನೋಡಿ
ಹೇಳಲಾಗದು ಅವರ ಭೂತಕಾಲದ
ಜಾತಿ, ಕುಲ ಗೋತ್ರಗಳನು

ನಶಿಸಿಹೋಗಿರುವ ಜೀವದ
ಕುಲಗೋತ್ರಗಳನು
ಹೇಳಲಾರೆ ನೀನು
ಅಸ್ಥಿಗಳೂ ಅರಿಯವು
ತಮ್ಮ ಗತಕಾಲದ ಅಸ್ಥಿತ್ವವನು

ಮಹಾತಾಯಿ ಮಡಿಲಿಂದ
ಭೂತಾಯ ಒಡಲನ್ನು
ಸೇರುವಾ ಈ ಬಾಳ ಪಯಣದಲಿ
ಜಾತಿ-ಬೇಧಗಳ ಮೀರಿ
ಬಾಳುವವನೇ ನಿಜ ಮನುಜ ನೋಡಾ .......