ಸಖೀಗೀತ

ಸಖೀ....

ಮನದಾಳದ ಪುಟಗಳನ್ನು
ತಿರುವಿ ಹಾಕುತ್ತಿದ್ದೆ...
ಯಾಕೋ ಏನೋ...
ಒಂದು ಪುಟದಿಂದ
ಕಣ್ಣು ಕೀಳಲೇ ಇಲ್ಲ....
ಹಿಂದೆಯೂ ಇಲ್ಲ, ಮುಂದೆಯೂ ಇಲ್ಲ
ನೋಟ ಸ್ಥಗಿತವಾಯಿತು
ಚಿತ್ರದಂತೆ
ಅಲ್ಲಿ ನೀನು ಬರೆದಿದ್ದು
ನಮ್ಮ ಸ್ನೇಹದ ಮುನ್ನುಡಿ...

ಹಲವಾರು ಪುಟಗಳಲಿ
ನಿನ್ನೊಂದಿಗೆ
ಬೆಟ್ಟದ ಮೇಲೇರಿ ಬಂಡೆಗಲ್ಲಿನ
ಮೇಲೆ ಕುಳಿತು ಹರಟಿದ ಮಾತುಗಳು
ಕೀಟಲೆ, ತುಂಟಾಟಗಳು
ಮುನಿಸು, ಕೋಪಗಳು
ಏನೆಲ್ಲಾ ಇದ್ದರೂ
ಅಪೂರ್ಣಗೊಳ್ಳುವುದು ಎನ್ನ
ಜೀವನ ಸಂಪುಟ
ನೀನು ನನ್ನೊಳಗೆ ಇರದಿದ್ದರೆ....