ಬಿಂಬ

ಅಪರಿಚಿತರನ್ನು
ಹುಡುಕಬೇಕಿದೆ ಈಗ
ಪೂರ್ವಾಪರಗಳನ್ನು
ಅರಿಯದೇ
ಎನ್ನ ಪ್ರತಿಬಿಂಬವನು
ಇದ್ದದ್ದು ಇದ್ದ ಹಾಗೆ
ಬಿಡಿಸುವಾ
ಅನಾಮಧೇಯರನ್ನು
ಹುಡುಕಬೇಕಿದೆ

ನಾಲ್ಕಾರು
ಮಾತುಗಳಾಡಿ
ಎನ್ನ ತುಮುಲ, ತರಲೆ
ತೆವಲು, ತಳಮಳಗಳ
ಮಳೆಯನ್ನು ಸುರಿಸಿ
ಎಲ್ಲಿಯೋ
ಅವಿತಿರುವ ಎನ್ನ
ನಿಜರೂಪವ ತೋರಿ
ಬಿಂಬವ ಬಿಡಿಸಲು
ಕೋರಬೇಕಿದೆ

ಬಲ್ಲವರು, ಪರಿಚಿತರು
ತಮಗೆ ಗೊತ್ತಿರುವಂತೆ
ಗೊತ್ತಿರಬಹುದೆಂಬ ಭಾವಗಳ
ಪೂರ್ವಾಗ್ರಹ ಪೀಡಿತ
ಬಣ್ಣ ಬಳಿದು
ಅವರಿಗಿಷ್ಟವಾದಂತೆ
ಎನ್ನ ಬಿಂಬವನು ಬಿಡಿಸಿ
ಮೂಲ ಬಣ್ಣವನ್ನೇ
ಮರೆಮಾಚಿದ್ದಾರೆ
ಅವರಿವರು ಬಿಡಿಸಿರುವ
ಚಿತ್ರದಲಿ
ನನ್ನ ನಾನೇ ಹುಡುಕಬೇಕಿದೆ

ಕನವರಿಕೆ.....

ಕನಸುಗಳ ವ್ಯವಹಾರ
ನನಗೆ ಬಾಲ್ಯದಿಂದಲೇ ಬಂದಿದ್ದು
ಮಣ್ಣಿನ ಮನೆಯ 
ತೊಲೆಗಳ ಕೆಳಗೆ, ನಾಗೊಂದಿಯ ಮೇಲೆ
ಸಾಲು-ಸಾಲಾಗಿ ಅಲಂಕರಿಸಿದ
ದೇವರು ದಿಂಡರು, ಮಹಾತ್ಮರ ಫೋಟೋಗಳು
ಹಿರಿಯರು ಹೇಳುತ್ತಿದ್ದ
ರಮ್ಯ-ರಮಣೀಯ ರೋಮಾಂಚಕ
ನೀತಿಕಥೆಗಳು, ಪುರಾಣ-ಭಾಗವತ
ಕಾಗಕ್ಕ-ಗುಬ್ಬಕ್ಕನ ಕಥೆಗಳು
ಇವುಗಳನ್ನೆಲ್ಲಾ
ಹಸಿಗೋಡೆಯಂಥಹ ನನ್ನ ಅಂತಃಪಟಲದ ಮೇಲೆ
ಅಚ್ಹೊತ್ತಿದಂತೆ ಹೇಳುತ್ತಾ
ಕಂಡು ಕಾಣದ
ನಾಳೆಗಳ ಕನಸು ಬಿತ್ತಿದರು.....

ನಂತರ ನೋಡಿ ಶುರುವಾಗಿದ್ದು
ಬರೀ ವ್ಯವಹಾರ-ವ್ಯಾಪಾರ
ದೊಡ್ಡೋನಾದಮೇಲೆ
ನೀನು ಹಿಂಗಾಗಬೇಕು, ಹಂಗಾಗಬೇಕು
ಹೆಂಗೆಂಗೋ ಆಗಬೇಕು
ನನ್ನತನವೆಂಬುದರ ಬೆಲೆ ತೆತ್ತು
ಕನಸುಗಳ ಕೊಂಡು
ಮಸ್ತಕದ ಮಾಡಿಗೆ ತುರುಕಿದ್ದೇ-ತುರುಕಿದ್ದು
ಅವರು ಮಾರಿದರೋ, ನಾನೇ ಕೊಂಡುಕೊಂಡೆನೋ
ಇಂದಿಗೂ ಅರಿವಾಗದು......

ಈ ಕನಸುಗಳ ವ್ಯಾಪಾರಸ್ಥರಿಗೆ
ಮಾನವೀಯತೆ, ಸಂಸ್ಕಾರ, ಪ್ರೀತಿ
ಇಂಥಾದ್ದೆಲ್ಲಾ ಅಲರ್ಜಿಯಿರಬೇಕು
ಅಂಥಾ ಸರಕು
ಅವರೆಂದಿಗೂ ಮಾರಲಿಲ್ಲ
ನಾನು ಅಷ್ಟೇ
ಅಂತಹುದನ್ನು ಖರೀದಿಸಲು
ಕಿಂಚಿತ್ತೂ ಯೋಚಿಸಿರಲಿಲ್ಲಾ.....

ಕೊನೆಗೂ
ಏನೇನೋ ಆಗಲು ಹೋಗಿ, ಏನೋ ಆಗಿಬಿಟ್ಟೆ
ಇಂದಿಗೂ ಪಳೆಯುಳಿಕೆಯಾಗಿರುವ
ಕೆಲವು ಕನಸುಗಳು ಕೊಳೆತು ನಾರುತ್ತಿವೆ
ಬಿಡುಗಡೆಗಾಗಿ, ಬಟವಾಡೆ ಮಾಡಲು
ಇನ್ನಿಲ್ಲದಂತೆ ಯಾಚಿಸುತ್ತವೆ
ನಾನೋ ಕನಸುಗಳ ಮಟ್ಟಿಗೆ
ಇನ್ನಿಲ್ಲದ ಜಿಪುಣ-ಕೃಪಣ
ನನ್ನತನವ ಕಳೆದುಕೊಂಡು ಕೊಂಡಿರುವ
ಸರಕು ಹಾಗೆ ಬಿಡಲಾದೀತೇ
ಕೊಳೆಯಲಿ ನಾನು ಎನ್ನುವ ಮುಖವಾಡ ಕಳಚುವವರೆಗೆ......

ವಕ್ರೀಭವನ

ಏನು ನೋಡಿದ್ರೂ
ಕಾಣಿಸಿರುವದಕ್ಕಿಂತ
ಗ್ರಹಿಸಿದ್ದೇ ಬೇರೆ
ಅದಕ್ಕೇ
ಯಾಕೋ-ಏನೋ
ದೃಷ್ಟಿ ಮತ್ತು ದೃಷ್ಟಿಕೋನಕ್ಕೂ
ಸಮಾಗಮವಾಗುತ್ತಿಲ್ಲಾ

ಶರಧಿಯ
ಆ ಬದಿಯಲ್ಲಿ
ಮುಳುಗುತ್ತಿರುವ ಸೂರ್ಯ
ಆತ್ಮಹತ್ಯೆ ಮಾಡಿಕೊಳ್ಳುತ್ತಿರುವಂತೆ 
ಒಮ್ಮೊಮ್ಮೆ ಕಂಡರೆ
ಅದೇ ದೃಶ್ಯ 
ದಿನವೆಲ್ಲ ದುಡಿದ ದಿನಕರ
ದಣಿವಾರಿಕೊಳ್ಳಲು ಅಭ್ಯಂಗಕ್ಕಾಗಿ
ನೀರಿಗಿಳಿದಂತೆಯೂ
ಒಮ್ಮೊಮ್ಮೆ ಭಾವ ಮೊಳೆಯುತ್ತದೆ...........

ಅದು ಯಾಕೆ
ಸೂತಕದ ಮನೆಯ ದುಃಖ
ನಮಗೆ ತಟ್ಟುವದಿಲ್ಲಾ
ನಾನು ಹೇಳುವುದು ವಕ್ರೀಭವನವೇ ಕಾರಣ
ಏಕೆಂದರೇ.....
ಅವರ ನೋವು
ನನ್ನ ಮನದಲ್ಲಿ ಪ್ರತಿಫಲಿಸುವುದೇ ಇಲ್ಲಾ

ನಿಮಗೆ ಗೊತ್ತಾ
ಹಾದಿ-ಬೀದಿ ಅಲೆದು
ಭಿಕ್ಷೆ ಬೇಡಿ
ಹಲವರ ಕೈಗುಣವ ಸವಿದು
ಸಂತೃಪ್ತಿಯಿಂದ ತೇಗುವ 
ಭಿಕ್ಷುಕನ ಹಸಿವು
ಪಂಚತಾರಾ ಹೋಟೆಲುಗಳ ಭಕ್ಷ್ಯಗಳ
ಸವಿದರೂ
ಸ್ವಾದವನರಿಯದ ನಮ್ಮ 
ಹಸಿವಿನಲ್ಲಿ ಮೂಡುವುದೇ ಇಲ್ಲಾ
ಮತ್ತದೇ ಕಾರಣ
ನಮ್ಮ ದೃಷ್ಟಿ ಮತ್ತು ದೃಷ್ಟಿಕೋನ
ಹಾಗೂ ವಕ್ರೀಭವನ..............

ಏನೋ ತೋಚಿದ್ದು

ಈಗೀಗ
ನನಗರಿವಿಲ್ಲದಂತೆ
ಪ್ರವಾದಿಯೊಬ್ಬ
ನನ್ನಂತರಾಳದಲಿ
ಅವತರಿಸುತ್ತಾನೆ

ನನ್ನಂತರಂಗದ ಕೊಳೆ
ಕಳೆದುಬಿಡುವನೆಂದು
ನನಗೂ ಒಂಥರಾ ಖುಷಿಯೇ
ಆದರೇ....
ಅವನೋ ಆಗಾಗ
ರಾಜಕಾರಣಿಯಂತೆ
ಕಾರಣವಿಲ್ಲದೇ
ಬೊಗಳೆ ಬಿಡುತ್ತಾನೆ

ಹಿಂದೊಮ್ಮೆ ಓದಿರುವ
ಅವರಿವರಲ್ಲಿ ಕೇಳಿರುವ
ಸದ್ವಿಚಾರಗಳ ತುತ್ತೂರಿಯನ್ನು
ಒಂದಿನಿತು
ಜೋರಾಗಿಯೇ ಊದುತ್ತಾನೆ
ನನ್ನೊಳಗೆ
ಬಿತ್ತಿ ಬೆಳೆಸಬೇಕಾಗಿರುವ
ವಿಚಾರಗಳನೆಲ್ಲ
ಅವನು
ಅಲ್ಲಲ್ಲಿ ಎರಚಲು
ಹೊಂಚುಹಾಕುತ್ತಾನೆ

ನನಗೋ
ತೆರೆದುಕೊಳ್ಳುವ ಹಂಬಲ
ಪಾಚಿಗಟ್ಟಿದ ಕೊಳೆಯನ್ನು
ತೊಳೆದುಕೊಳ್ಳುವ ಹಂಬಲ
ಆದರೇನು
ಅವನು ಎನ್ನ ಬಾಯಿಗೆ
ಕೆಲಸಕೊಟ್ಟು
ಕಣ್ಣು, ಕಿವಿಯನ್ನು ಮುಚ್ಚಿದ್ದಾನೆ
ಎನ್ನೊಳಗಿನ ದುರ್ಘಂಧವನು
ಸಹಿಸದೇ
ಅವನು ಈಗೀಗ
ಮೂಗು ಮುಚ್ಚಿಕೊಂಡು
ಹಗಲಿರುಳೂ
ಪ್ರವಚನ ನೀಡುತ್ತಿದ್ದಾನೆ.......

ನನ್ನತನಕ್ಕೆ ತೆಳುವಾದ
ತೆರೆಯೆಳೆದು
ಅಂತರಾಳದಿ ಅವತರಿಸಿದ ಪ್ರವಾದಿ
ಜಗವ ಬೆಳಗುವ
ಹುಂಬತನದ ಹಂಬಲ ಮೆರೆಯುತ್ತಿದ್ದಾನೆ....

ಆತ್ಮಸಾಕ್ಷಿ

ಶ್ !!!
ಸ್ವಲ್ಪ ಸಹನೆಯಿಂದಿರಿ
ನಾಲ್ಕಾರು ನಿಮಿಷ
ಮೌನವಾಗಿ
ನಿಮ್ಮೊಳಗೆ ಅಡಗಿರುವ
ನಿಮ್ಮ ಆತ್ಮ
ಉಲಿವುದನೂ ಕೇಳಿ

ಬೋಧಿಸುವುದ ನಿಲ್ಲಿಸಿ
ಮರುಳು ಮಾಡುವ
ವಾಗ್ಬಾಣಗಳಿಗೆ ವಿರಾಮ ನೀಡಿ
ಪಾಂಡಿತ್ಯ, ಬಿರುದುಗಳ
ಕಳಚಿ
ನಿಮ್ಮತನದ ಪ್ರತಿಬಿಂಬ ನೋಡಿ

ಎಡ-ಬಲಗಳ ಮೀರಿ
ಹಾಡುಹಗಲೇ ಇರುಳನ್ನು ಹೊದ್ದ
ನೊಂದವರ
ಒಂದರೆಕ್ಷಣ ನೋಡಿ
ಅವರ ಬಾಳಿಕೆ ಬೆಳಕು ನೀಡಿ
ಇಲ್ಲವಾರದೇ
ಪಕ್ಕಕ್ಕೆ ಸರಿದು ಅವರನ್ನು ಸಾಗಲು ಬಿಡಿ

ದಯವಿಲ್ಲದ ನಿಮ್ಮ
ಧಾರ್ಮಿಕತೆಯ ಕತೆಗಳ
ಮೂಲೆಗಿಡಿ ಗಂಟು-ಮೂಟೆ ಕಟ್ಟಿ
ಹಸಿದವರ ಮುಂದೆ
ಉಲಿಯುವಾ ನಿಮ್ಮ ಪ್ರವಚನಕೆ
ಒಂದಿನಿತು ವಿರಾಮ ನೀಡಿ
ಹಸಿವು ತಣಿಸಬಹುದಾದರೂ
ಕಾಮಾಲೆ ಕಣ್ಣುಗಳ
ಪೊರೆಯ ಹರಿದು ಹಾಕಿ

ಶ್ !!!
ಸ್ವಲ್ಪ ಮೌನವಹಿಸಿ
ವಾಗ್ವಾದಗಳ ನಡುವೆ
ನಿಮ್ಮ ಗಮನಕ್ಕೆ ಬಾರದೇ
ಕೊನೆಯುಸಿರೆಳೆದ ಆತ್ಮಗಳಿಗೆ
ಚಿರಶಾಂತಿ ಕೋರಿ
ಅರೆ ನಿಮಿಷ ಕಣ್ಣು ಮುಚ್ಚಿ
ನಿಮ್ಮ ಪ್ರತಿಬಿಂಬವ
ನೀವೇ ನೋಡಿ.......

ಸ್ವಗತ

ನಾನು
ನಾನೇ !! ಎಂಬುದಕ್ಕೆ
ಪುರಾವೆ ಹುಡುಕುತ್ತಿದ್ದೇನೆ
ಗುರುತಿನ ಚೀಟಿಗಳಲ್ಲಿ
ಮರೆತಿರುವ ಪುಟಗಳಲ್ಲಿ
ಗೊತ್ತು ಗುರಿಯಿಲ್ಲದೇ ಸಾಗುವಾ
ಬೀದಿಗಳಲ್ಲಿ.....

ಹೊರಟಲ್ಲೆಲ್ಲಾ ಹೊಸ ಸುಳಿವು
ಕೈಗೆ ತಾಕಿದ್ದರಲ್ಲೆಲ್ಲಾ

ಕಾಣುವ ಬಹುರೂಪಿ ಮುಖವಾಡಗಳು

ಎದುರಿಗೆ ಸಿಗುವಾ
ಯಾವ್ಯಾವದೋ ಮುಖಗಳ
ದಿಟ್ಟಿಸಿ ನೋಡಿದಾಗ ಎನ್ನ
ಅಣಕಿಸುತ್ತವೆ....

ಗುರುತು ಪರಿಚಯವಿಲ್ಲದ
ಅಪರಿಚಿತರು ಎದುರಾಗಿ

ಅರಿತೋ ಅರಿಯದೆಯೋ ನಕ್ಕಾಗ !!
ಮೈ-ಪರಚಿಕೊಂಡು ನಾನು

ಹುಸಿನಗೆಯ ಬೀರಿ ಮುನ್ನಡೆದ

ಅವನು !!!
ಯಾರೆಂಬುದನು ಅರಿಯಬೇಕಿದೆ....

ನಾಮವೊಂದಾದರೇ
ನನ್ನತನವೇನು ಸಾಬೀತಾಗುವುದೇ
ಭಾವ-ಚಿತ್ರದ ಹುಸಿನಗು
ಅಂತರಾಳದ ಕಲುಷಿತ ಭಾವಗಳ
ಮರೆಮಾಚಿ
ಅಟ್ಟಹಾಸ ಮಾಡುತಿದೆ....

ಆತ್ಮೀಯರ ಕರೆಗೆ ಓಗೊಡುವ ನಾನು,
ಪುಳಕಗೊಳ್ಳುವ ನನ್ನ ಪಂಚೇದ್ರಿಯಗಳು
ಇಲ್ಲಸಲ್ಲದವರ ಕಿರಿ-ಕಿರಿಯ ಕರೆಗೆ
ಓಗೊಡುವ !!!
ನನ್ನ ನಾಟಕೀಯತೆಯ ನಡುವೆ

ಪಾತ್ರದ ಬಣ್ಣ ಕಳಚಿದಾಗ
ಕಾಣಬಹುದಾದ ನನ್ನನು
ಹುಡುಕಿ
ನನ್ನತನಕ್ಕೆ ಪುರಾವೆ ಕೇಳಬೇಕಿದೆ....

ಚರಮ-ಗೀತೆ

ಜಾತಸ್ಯ
ಮರಣಂ ಧೃವಂ
ಸಾಯಲಿಕ್ಕಾದರೂ ಬದುಕಬೇಕು
ತುರ್ತು ನಿಗಾ ಘಟಕದಲಿ
ಉನ್ಮತ್ತನಾಗಿ ಉಸಿರಾಡುತ್ತಿರುವ
ರೋಗಿಯೊಬ್ಬನ ಬಯಕೆ

ಕಾಲನ ಕರೆಯನ್ನು ಧಿಕ್ಕರಿಸಲು
ಗುಳಿಗೆ, ಮಾತ್ರೆಗಳು, ಸಿರಿಂಜು-ಸಲೈನುಗಳು
ಕೊಳೆತ ಅಂಗವನ್ನು ಕತ್ತರಿಸಿ
ಹೊಲೆಯುವಾ ಶಸ್ತ್ರ-ಉಪಕರಣಗಳ
ಪೈಪೋಟಿಯ ಸದ್ದು
ನಾಲ್ಕಾರು ಮುಖವಾಡಗಳ ನಡುವೆ
ಗೋಚರಿಸುವ ಜೋಡಿಕಣ್ಣುಗಳು
ಬದುಕಬೇಕೆಂಬ ಏಕಮೇವಾದ್ವಿತೀಯ ಆಸೆ
ಆಸ್ಪತ್ರೆಯ ಮಾಸಲು ಹಾಸಿಗೆಯನ್ನು
ಅಂಟಿಕೊಳ್ಳುವವರೆಗೆ
ಬದುಕಿದ್ದಾದರೂ ಏನು ???

ಅಗಣಿತ ಸಂಪತ್ತು ಎಣಿಸಲು ಯಂತ್ರಗಳು
ಗುಡಿಸಲು ವಾಸಿಗಳ ಒಕ್ಕಲೆಬ್ಬಿಸಿ
ನಿರ್ಮಿಸಿದ ನಿರ್ಜೀವ ಬಂಗಲೆಗಳು
ನಿತ್ಯ-ಹರಿದ್ವರ್ಣ ಫಲವತ್ತಾದ
ಭೂಮಿಯನ್ನು ಕಬಳಿಸಿ ಕಟ್ಟಿದ
ಹಸಿರು ಹಾಸಿನ ಫಾರ್ಮ್-ಹೌಸುಗಳು
ಸ್ನೇಹ, ಪ್ರೀತಿ ಬಾಂಧವ್ಯದ ಸೋಂಕಿಲ್ಲದ
ಸಂ-ಬಂಧಗಳು
ಎಲ್ಲವೂ ಲೆಕ್ಕಾಚಾರ
ಸರಳ ಅಂಕಗಣಿತವಾದರೂ
ಕೂಡಿಕೆ, ಹೂಡಿಕೆ ಗುಣಾಕಾರದಿ
ಕಳೆದು ಹೋದ ಬದುಕಿಗೆ ಅರ್ಥವಿಲ್ಲಾ....

ಯಾಕೋ ಈಗೀಗ ನೆನಪಾಗುತ್ತಿದೆ
ಎಣ್ಣೆ ಕಾಣದ ತಲೆಯನ್ನು ಕೆರೆಯುತ್ತಾ
ಮರ್ವಾದೆ ಎಂಬುದನು ಮುಚ್ಚಲು ಚಡ್ಡಿಯೊಂದಿದೆ
ಎಂಬುದನೂ ಅರಿಯದೇ
ಸೋರುತ್ತಿರುವ ಸಿಂಬಳವನ್ನೂ ಲೆಕ್ಕಿಸದೇ
ಐಸ್ ಕಟ್ಟಿ ಮಾರುತ್ತಾ ಅಲೆಯುವಾ
ಶಂಕ್ರಣ್ಣನ ಡಬ್ಬದಿಂದ ಸೋರುವಾ
ಕೆಂಪು ಹನಿಗಳನ್ನು ಬೊಗಸೆಯೊಡ್ಡಿ ಹಿಡಿದು ನೆಕ್ಕುವಾ
ಮರವನ್ನೇರಿ ಹುಣಸೆ ಕಿತ್ತು
ಓರಗೆಯವರ ಮನೆಯಿಂದ ಉಪ್ಪು, ಕಾರ, ಬೆಳ್ಳುಳ್ಳಿ ತಂದು
ಕುಟ್ಟಿ ಕಡ್ಡಿಗೆ ಅಂಟಿಸಿ ಸೊರ್ರ್-ಸೊರ್ರ್ ಸವಿದಿರುವ
ಕ್ಷಣಗಳು
ಮುಚ್ಚಿರುವ ಕಣ್ಣುಗಳ ಹಿಂದೆ ನಲಿದಾಡುತ್ತಿವೆ....

ಕುಶಲೋಪರಿಯ ನೆವದಲಿ
ಬಂದು ಮುತ್ತಿಕ್ಕಿರುವ ಬಂಧು-ಬಾಂಧವರ
ಪಿಸುಮಾತುಗಳು
ಭಗವಂತ ಎಲ್ಲವನೂ ಕೊಟ್ಟ ಇನ್ನೇನು ಬೇಕು
ಬದುಕು ನಾಲ್ಕಾರು ದಿನಗಳ ಸಂತೆ ಎನ್ನುವ ವೇದಾಂತ
ಹುಸಿ-ನಗುವ ಹೊತ್ತು ಹೊಗಳುವಾ
ಮುಖವಾಡಗಳು....
ಸಾಯಲಿರುವ ಆನೆಯ ಮೌಲ್ಯ ಕಟ್ಟುವಾ ನೋಟಗಳು
ಕಣ್ಣು ಮುಚ್ಚಿದರೇ ಮತ್ತದೇ ಬಾಲ್ಯದ ನೆನಪುಗಳು
ಸಾಯಲಿಕ್ಕಾದರೂ ಬದುಕಬೇಕು.......

ಪಯಣ

ಯಾಕೋ ಏನೋ
ಥಟ್ಟನೆ
ಹಿಂತಿರುಗಿ ನೋಡಿದಾಗ
ಅಲ್ಲಲ್ಲಿ ಬಿದ್ದಿರುವ
ನಿನ್ನೆಗಳು.....

ಶಿಥಿಲಾವಸ್ಥೆಯಲಿ
ಹಾಳು ಕೊಂಪೆಯಂತೆ
ಕೈಕಾಲು ಮುರಿದುಕೊಂಡು
ಭಗ್ನಾವಸ್ಥೆಯಲಿ ಚದುರಿ
ಅನಾಥ ಶವಗಳ
ತೆರದಿ
ಹರಡಿಕೊಂಡಿರುವ
ನೋವುಗಳು.....

ಎಂದೋ
ಬೀಸಿದ ಬಿರುಗಾಳಿಗೆ
ಸಿಕ್ಕ ತರಗೆಲೆಗಳು
ಗಗನಚುಂಬಿಯಾಗಿ ಹಾರಾಡಿ
ಮತ್ತೆ
ಧರೆಗುರುಳಿ
ಮಣ್ಣಿಗೆ ಲೀನವಾಗಿ
ಅಲ್ಲಿಯೇ ಚಿಗುರೊಡೆದು
ಮಂಜ ಹನಿ ಹೊತ್ತು ಸಿಂಗಾರಗೊಂಡ
ಗರಿಕೆಗಳ ಅಂಚು.....

ನಿಟ್ಟುಸಿರು ಹೊಮ್ಮಿ
ಕಣ್ಣಾಲಿಗಳು ತುಂಬಿ
ಕಾಣುವುದೆಲ್ಲವೂ ಕಣ್ಮರೆಯಾಗಿ
ಹೆಜ್ಜೆಗಳು ಹಿಡಿದ ದಾರಿಯೇ
ಗುರಿಯಾಗಿ
ಸಾಗುತಿದೆ ಪಯಣ......

ಆಚೀಚೆ ನೋಡಿದಾಗ....

ಬಿಸಿಲು ಹರಡುವ ಅವನ
ದೈನಂದಿನ ಕ್ರಿಯೆಗೆ
ಒಮ್ಮೊಮ್ಮೆ...

ಅಡಚಣೆ ಮಾಡುತ್ತಿವೆ ಮೋಡಗಳು....
ಆದರೂ
ಇಣುಕಿ ನೋಡುತ್ತಾನೆ
ಆಗಾಗ ಮೋಡಗಳ ಮರೆಯಿಂದ...

ಅವನು ಗೋಚರಿಸಿದಾಗಲೆಲ್ಲಾ
ಹೂವುಗಳ ಮೊಗದಲ್ಲಿ ಮಂದಹಾಸ...
ಗರಿಕೆಯಂಚನು ಅಲಂಕರಿಸಿದ
ಮುತ್ತಿನ ಹನಿಯಲ್ಲಿ ಮುಗುಳ್ನಗು ಮೂಡಿ
ಆಗಸವನ್ನು ಅಲಂಕರಿಸುವಾ
ಸಪ್ತವರ್ಣದ ಕಾಮನಬಿಲ್ಲು....

ಇಳೆ, ಹೂವು, ಹಸಿರನ್ನು
ನೋಡುವ ಅವನ ಬಯಕೆಗಳಿಗೆ
ಅಡ್ಡ ಬರುವ ಮೋಡಗಳೂ
ಅವನ ತಾಪಕ್ಕೆ
ಕರಗಿ ಹನಿಯುತ್ತವೆ....
ಒಮ್ಮೊಮ್ಮೆ
ನಿಟ್ಟುಸಿರು ಬಿಡುವ ಪ್ರೇಯಸಿಯಂತೆ
ಆವಿಯಾಗಿ ಕಣ್ಮರೆಯಾಗುತ್ತವೆ

ಹಾಗೇ ಸುಮ್ಮನೇ....

ಹೇಳದೇ ಹೋಗುವುದು....
ಕಾಲ ಮತ್ತು "ನಾನು" ಮಾತ್ರ.....

ಕಾಲ ಸರಾಗವಾಗಿ ಓಡುತ್ತೆ
ನಮ್ಮ ಸಂತಸದ ಸಮಯದಲಿ
ಕಾಲಕೂ ಹೆಜ್ಜೆಗಳು ಭಾರ
ನಮ್ಮ ಸಂಕಷ್ಟ ಸಮಯದಲಿ

ಅರಿವು ಬಂದಾಗಲೇ ಅಂದುಕೊಂಡೆ
"ನಾನು" ಹೋಗಬೇಕೆಂದು
ಹೆಜ್ಜೆ ಇಟ್ಟಾಗಲೊಮ್ಮೆ ಸಾಬೀತಾಗಿದೆ
ಅದು ಸುಲಭದಲಿ ಸಾಧಿಸುವದಿಲ್ಲವೆಂದು.....

ಗೋಜಲು, ಗೊಂದಲ ಸಂಬಂಧಗಳ
ಸುಳಿಯಲ್ಲಿ ಸಿಲುಕಿಕೊಂಡು
ನಿಶ್ಚಲವಾಗಿದೆ, ವಿಹ್ವಲವಾಗಿದೆಯೆನ್ನ ಮನ
ಇದಕ್ಕೆ ಕಾಲವೇ ಸಾಕ್ಷಿ...

ಕತ್ತಲೆಯ ಮೂಲೆಯಲಿದ್ದರೂ
ಗೋಚರಿಸುತ್ತಿದೆ
ಎಲ್ಲ ಕಳಚಿ ಬಯಲಾಗುವವರೆಗೆ
"ನಾನು" ಹೋಗುವುದು ಸಾಧ್ಯವಿಲ್ಲವೆಂದು....

ಸಂ-ಶೋಧನೆ

ಮನವ
ಮುದಗೊಳಿಸಲು
ಏನೋ !!
ಅರಸುತ್ತಿರುವ
ನೋಟ...

ಇಲ್ಲಿಯೇ ಇತ್ತು
ಕೈಗೆಟುವಂತೆ !!
ಎಲ್ಲಿ ಹೋಯಿತೋ
ಎಂದು
ಹುಡುಕುತ್ತಿರುವ
ಕರಗಳು....

ಒಂದೆಡೆಗೆ
ನಿಲ್ಲದೇ
ಜೀವನವಿಡೀ
ನೆಮ್ಮದಿಯನರಸಿ
ಅಲೆಯುವಾ
ಕಾಲುಗಳು....

ನನ್ನದಲ್ಲದ
ಸಂಗತಿಯೊಳಗೆ ತೂರಿ
ನನ್ನತನವನು
ಅರಸುತ್ತಿರುವ ಮನ

ಎಲ್ಲ ಗೋಜಲುಗಳ
ನಡುವೆ
ಕಳೆದು ಹೋಗಿರುವ
ನಾನು.....

ವಿದಾಯ

ಸಮಯ
ಮುಗಿದ ನಂತರ
ಹೊರಡಲೇ ಬೇಕು.

ನಿಲ್ಲುವ ಹಾಗಿಲ್ಲಾ,
ಸ್ವಲ್ಪ ಹೊತ್ತು
ಕುಳಿತಿರಬಹುದಾದರೂ
ಹೊತ್ತು ಕಳೆಯುವ
ಜಾಗವಿದಲ್ಲಾ.

ಹೊರಡುವ ಸಮಯ
ಹೊರಟೆ ಅಷ್ಟೇ !!!

ಎಲ್ಲಿಗೆ ಹೋಗುವುದು
ತಲೆಯಿಂದ ಕಾಲುಗಳಿಗೆ
ಸೂಚನೆಯೇನೂ ಬಂದಿಲ್ಲ
ಕಾಲುಗಳು
ತಮ್ಮ ಹೆಜ್ಜೆ-ಹೆಜ್ಜೆಯಲಿ
ದೂರವನು
ಕ್ರಮಿಸುತ್ತಾ ಸಾಗಿವೆ...

ಸೇರಬೇಕಾಗಿರುವ
ಗಮ್ಯದ ಬಗೆಗೆ
ಸೂಚನೆ
ದೊರಕುವವರೆಗೆ
ಸುಮ್ಮನೇ
ಗೊತ್ತು-ಗುರಿಯಿಲ್ಲದಾ
ಅಲೆದಾಟ...

ಕಾಲಚಕ್ರ

ಕಾಲ
ಕಾಯುವದಿಲ್ಲ...
ಕಾರಿನಲಿ ಹೋದರೇನು
ಕಾಲ್ನಡಿಗೆಯಾದರೇನು
ಕಾಲನಡಿಗೆ
ಸಿಲುಕಿ
ಸಂವತ್ಸರವೊಂದು
ಉರುಳಿದೆ

ಬಾಳ ಪಯಣದಲಿ
ಅತ್ತಿತ್ತ ನೋಡುತ್ತಾ
ಸಾಗುವಾಗ
ಕೈ-ಬೀಸಿ
ಕರೆದವರು ಕೆಲವರು
ಕೈ-ಕುಲುಕಿ
ಜೊತೆಗೆ
ನಡೆದವರು ಕೆಲವು

ಅಪರಿಮಿತ ಜಾಗ
ಹೃದಯಾಂತರಾಳದೊಳಗೆ
ಸೇರಿ ನಲಿದಾಡುತಿಹರು
ಕೆಲವರು
ಅಂತರಂಗದಲಿ
ರಂಗು-ರಂಗಿನ
ರಂಗೋಲಿ ಬಿಡಿಸುತಾ
ಹರಿಸುವರು ಅನವರತ
ಸವಿ-ನೆನಪ ಧಾರೆ......

ಸುಮ್ಮನೇ

ಏನು ಮಾಡ್ತಿದ್ದೀರಿ

ಆಗಂತುಕರೊಬ್ಬರ ಉವಾಚ
ಸುಮ್ಮನೇ ಕುಳಿತಿರುವೆ
ಎಂದೆನಾದರೂ
ಉತ್ತರಿಸುವಾಗ ತಡವರಿಸಿದೆ

ಮನಸಿಗೆ ಕಸಿವಿಸಿ
ಸುಮ್ಮನೆ ಕುಳಿತದ್ದು ಯಾರು...
ಜಡವಾದ ದೇಹ ಮಾತ್ರ
ಮಸನೆಂದೂ ಜಡವಾಗಲಿಲ್ಲ
ಶೂನ್ಯ ಕವಿದರೂ
ಹುಡುಕಾಟ ನಿಲ್ಲುವುದಿಲ್ಲ

ಹುಚ್ಚುಗುದುರೆಯನೇರಿ
ಲಂಗು ಲಗಾಮಿಲ್ಲದೇ
ಕಾಲ-ದೇಶಗಳ ಗಡಿಯನ್ನು ದಾಟಿ
ಅಖಿಲಾಂಡ ಬ್ರಹ್ಮಾಂಡವನು
ಕಲ್ಪನಾತೀತ ವೇಗದಲ್ಲಿ
ತಿರುಗುತ್ತಿರುತ್ತದೆ

ನಿರೀಕ್ಷೆ

ಏಕಾಂಗಿಯಾಗಿ

ಅನಂಗರ ನಡುವೆ
ಬಸ್ ಸ್ಟಾಪಿನಲ್ಲಿ ನಿಂತು
ಬೆದರಿದ ಹರಿಣದಂತೆ
ಅತ್ತಿತ್ತ ನೋಡುತ್ತಿರುವ
ಚಂಚಲಗಣ್ಣುಗಳ ಚೆಲುವೆ

ಆಗಾಗ ತಿರುಗಿ
ಉತ್ತರ ದಿಕ್ಕಿನೆಡೆಗೆ
ನಿರೀಕ್ಷೆಯ ನೋಟ...
ಬಾರದಿರುವ ಇನಿಯನ ನೆನೆದು
ಬರುವ ನಿಟ್ಟುಸಿರೇ ಉತ್ತರ

ಒಂಟಿ ಚೆಲುವೆಯ
ಸುತ್ತ ಸುಳಿದಾಡುವ
ಚಪಲ ಚೆನ್ನಿಗರಾಯರ
ಸಹಸ್ರಾಕ್ಷನಂತೆ ಇರಿಯುವ
ಕಾಮಾಲೆ ಕಣ್ಣುಗಳ ನೋಟ

ಬದುಕನ್ನೇ ಬೊಗಸೆಯಲಿಟ್ಟು
ಹನಿ ಪ್ರೀತಿಗಾಗಿ ಕನವರಿಸಿ
ಕಾಯುವುದೊಂದೇ ಭಾಗ್ಯ
ನುಂಗಬಾರದೇ ಅವನಿ
ಸೆಳೆಯಲಾರದೇ ಆಗಸ
ಸಾಕು ಈ ಕಾಯುವ ಕೆಲಸ

ವಿಪರ್ಯಾಸ

ಪುಸ್ತಕದ

ಕೊನೆಯ ಪುಟದಲ್ಲಿ
ರಟ್ಟಿನ ಮೇಲೆ
ಬರೆದಿರುವ ಅವಳ ಹೆಸರು
ಹಲವು ಬಾರಿ ಬರೆದು
ಅವರಿವರು ನೋಡಿಯಾರು
ಎಂಬ ಅಳುಕಿನಲಿ
ಕಾಟು, ಗೀಟು ಹೊಡೆದು...
ಅಳುಕಿಸಲೆತ್ನಿಸಿ
ಅದರಲ್ಲಿಯೇ
ನವ್ಯಕಲೆಯನ್ನೂ ಮೀರಿಸುವ
ಚಿತ್ರವನೂ ಬಿಡಿಸಿ
ಅಕ್ಕ-ಪಕ್ಕ
ಯಾರೂ ಇಲ್ಲದಾಗ
ಮನದಲ್ಲಿ ಸಂಚಲನ ಮೂಡಿಸಿದ
ಚಂಚಲೆಯ ನೆನೆಯುತಾ
ಏಕಾಗ್ರಚಿತ್ತದಿಂದ
ರವಿವರ್ಮನಂತೆ ಅವಳ
ಚಿತ್ರವನೂ ಬಿಡಿಸಿ

ಕಾಲೇಜು ಕಟ್ಟೆಯನು
ಹಲವಾರು ಸಲ ಎಡವಿ
ಬಾಳ ಕಟ್ಟಿಕೊಳ್ಳುವ
ಹಂಬಲದಲಿ ಹಗಲಿರುಳು
ಅಲೆದಾಡಿ
ಹಸಿವು-ಬಾಯಾರಿಕೆಗಳ
ಹೊತ್ತು ತಿರುಗಿ
ಮರಳಿ ಗೂಡಿಗೆ ಬಂದಾಗ
ಕಿಲುಬು ಕಾಸು ಕಾಣದಿರುವಾಗ
ಹಗಲಿರುಳೂ ಉರುಹೊಡೆದು
ಗಳಿಸಿದ ಪದವಿಯನೆ ನೆನೆದು
ಹಳೆಯ ಪುಸ್ತಕಗಳನು
ರದ್ದಿ ಹಾಕುವ ಸಮಯದಿ
ಮತ್ತೆ ಪ್ರತ್ಯಕ್ಷವಾಯಿತು
ಕೊನೆಯ ಪುಟ
ಕಣ್ಮುಂದೆ ಮೂಡಿದ
ಅವಳು
ಪಿಸುಮಾತಿನಲಿ ಉಲಿದಳು
ಗೆಳೆಯಾ ಮರೆಯದಿರು
ಇದು ಬದುಕಿನ ಮೊದಲ ಪುಟ

ಬೆಳಕು

ಕಂಬಗಳ ನಡುವೆ

ತೂರಿ ಬರಿತಿರುವ
ಹಣತೆಯ ಬೆಳಕು
ಸೆಳೆಯುತ್ತಿದೆ

ನೆರಳುಗಳ ಮಧ್ಯದಲಿ
ಬೆಳಕಿನ ದಾರಿಯಲಿ
ಸಾಗುತಿರುವೆ...
ಗಮ್ಯವ ಹುಡುಕುತ್ತಾ

ಬೆಳಕು ಬೇಕು
ಮುಂದೆ ಸಾಗಲು
ನೆರಳಿನಾಟವ ಮೀರಿ
ಮುನ್ನಡೆಯಬೇಕು

ಸೂರಿನಡಿಯಿಂದ
ಪಾರಾಗುವ ಹಂಬಲ
ತೆರೆದ ಆಗಸದಿ ಮಿಣುಕುವ
ನಕ್ಷತ್ರಗಳ ಬೆಳಕಲಿ
ದಾರಿ ಬೆಳಗಬೇಕು

ಅನಿರೀಕ್ಷಿತ

ಗೆಳಯಾ...
ನೋಡ ನೋಡುತ್ತಿದ್ದಂತೆ
ಹಾಗೇಕೆ ರಸ್ತೆ ಬದಲಾಯಿಸಿದೆ ನೀನು
ಅರೆಕ್ಷಣದಿ ಕವಲು ದಾರಿಯಲಿ
ದೂರ ಸಾಗಿಬಿಟ್ಟೆವಲ್ಲಾ....

ದುಂಡಗಿನ ಜಗವು
ಮತ್ತೆ ಸೇರಿಸಿತಲ್ಲಾ
ಮತ್ತೊಮ್ಮೆ ಕಣ್ಣನೋಟದಿ
ಬಂಧಿಯಾದೆವಲ್ಲಾ...

ಮುಖದಲ್ಲಿ ಆವರಿಸಿದ ಸುಕ್ಕಿನ ಗೆರೆಗಳು
ಒಂದೊಂದು ಗೆರೆಯಡಿಯೂ
ನೂರು ನೆನಹುಗಳು
ಬೆಳ್ಳಿಕೂದಲಿನಡಿಯ ಸಿಕ್ಕುಗಳು
ಗಂಟಿಕ್ಕಿರುವ ನೆನಪಿನಾ ಬುತ್ತಿ

ಅಂದು ಕೈಜೋಡಿಸಿ
ಜಿಗಿಯುತ್ತಾ-ನೆಗೆಯುತ್ತಾ
ಬದುಕು ಎಂದರೇನೆಂದು
ಅರಿಯುವಾ ಮೊದಲೇ
ಕೈಬಿಡಿಸಿಕೊಂಡು ಪಯಣ ಸಾಗಿತಲ್ಲಾ...

ನಿನ್ನ ಕೈಹಿಡಿದಿರುವ ಆ ಪುಟ್ಟ ಪೋರಿ
ನನ್ನ ತೋಳಿನಾಸರೆಯಲಿ
ಬೆಚ್ಚಗೆ ಕುಳಿತಿರುವ ಎನ್ನ ಮಗು
ನಮ್ಮೀರ್ವರ ಕೈಗಳು
ಮತ್ತೆ ಸೇರದಂತೆ ಬಂಧಿಸಿವೆಯಲ್ಲಾ...

ಏನದು
ನಮ್ಮೀರ್ವರ ಸಂ-ಬಂಧ
ಮನದಲೆಲ್ಲೋ ವೀಣೆ ಮಿಡಿಯುತಿದೆ
ಮರೆತು ಹೋಗಿರುವ
ಬಾಳ ಸ್ವರವ ಹರಡುತಿದೆ

ಮತ್ತೆಂದೂ ಸೇರದು
ನಮ್ಮ ಕೈಗಳು
ಕುಣಿದು-ಕುಪ್ಪಳಿಸುವ ಕಾಲವಲ್ಲ
ಅಪ್ಪಳಿಸುತಿದೆ ಸಂ-ಸಾರ ಸಾಗರದ ತೆರೆಯು
ಅಲ್ಲಿಯೂ ಕಾಡುತಿದೆ ನಿನ್ನೊಲವಿನಾ ಸಂಗೀತ.....

ಏನೋ ತೋಚಿದ್ದು

ಕಿಟಕಿಯಿಂದಾ
ತೂರಿ ಬರುವ ತಂಗಾಳಿಯಲಿ
ಕುಳಿತ ಕುರ್ಚಿಯ
ಎಡ-ಬಲ ಕಾಲಡಿಯಲ್ಲಿ
ಬಿರುಬಿಸಿಲಿನಲಿ
ನಳನಳಿಸುತ್ತಿರುವ ಹೂವಿನಲ್ಲಿ
ಹನಿ ನೀರಿಗಾಗಿ
ಹಪಹಪಿಸಿ ಬಾಯ್ದೆರೆದಿರುವ
ಭೂಮಿಯ ಕೊರಕಲಿನಲ್ಲಿ
ಎಲ್ಲೆಲ್ಲೂ ಚೆಲ್ಲಿವೆ

ಚೆಲ್ಲಾಪಿಲ್ಲಿಯಾಗಿ ಹರಡಿವೆ
ಅಕ್ಷರಗಳು
ಬೀಸುವ ಗಾಳಿಗೆ
ಚೆದುರಿಹೋದ ಕಾಗದದ
ತುಂಡುಗಳಂತೆ
ಎಲ್ಲಿ ನೋಡಿದರೂ
ಭಾವನೆಗಳು ಚದುರುತ್ತಿವೆ
ಕವಿತೆಯ ತುಣುಕುಗಳಂತೆ

ಒಪ್ಪವಾಗಿ ಓರಣವಾಗಿ
ಜೋಡಿಸಿ
ಭಾವನೆಗಳ ಪೋಣಿಸಿ
ಪುಟ್ಟ ಕವಿತೆಯೊಂದನ್ನು
ಬರೆಯಲೂ ಸಿಗದಂತ
ಚಂಚಲ ಮನಸು.....

ಬದುಕು

ಕಣ್ಣು ಹಾಯಿಸಿದಷ್ಟೂ
ಕಾಲಡಿಯಲಿ ಬಿದ್ದಿರುವ
ಬದುಕು....

ಅಕ್ಕಪಕ್ಕದಲಿ
ಅವರಿವರು ಬಂದು
ಸೇರಿದ ಪಯಣಿಗರು

ಆಗಾಗ ಧುತ್ತನೆ
ಎದುರಾಗುವ
ಕವಲು ದಾರಿಗಳು

ಮುಂದೆ ಸಾಗಬೇಕು
ಗಮ್ಯವು ಕಾಣದು
ಗುರಿಯ ತಲುಪಲು

ಎಡವಿದಾಗ ಎತ್ತಿ ಹಿಡಿದು
ಮುನ್ನಡೆಸಲು
ಸಂಗಾತಿಗಳು ಬೇಕು