ಮೊದಲ ಭೇಟಿ

ಕಿಷ್ಕಿಂಧೆಯಂಥಾ
ನನ್ನ ರೂಮಿನ
ಧೂಳಿನ ಕಣಗಳ ಮೇಲೆ
ನೀನಂದು ಅಡಿಯಿಟ್ಟು
ನನ್ನ ಮನದೊಳಗೆ
ಇಣುಕಿ ನೋಡಿದ ಕ್ಷಣದಿಂದ
ನೀ ನೆಟ್ಟ ಪ್ರೇಮದ ಬೀಜ
ಮೊಳಕೆಯೊಡೆದು
ನಳನಳಿಸುತ್ತಿದೆ ಇಂದಿಗೂ
ನಿನ್ನ ಪಾದದ ಗುರುತು
ಅಚ್ಚಳಿಯದಂತೆ ಉಳಿಸಿದೆ
ಎನ್ನ ಮನೆಯನು ಬೆಳಗುವವರೆಗೆ
ಮುರುಕು ಕುರ್ಚಿಯಲ್ಲಿ
ನೀನು ಕುಳಿತು
ಅಂದು ಆಡಿದ
ಮೊದಲ ಮಾತು
ಮನದಾಳದಿ ಹಸಿರಾಗಿದೆ ಇಂದಿಗೂ
ನಿನ್ನ ವೈಯ್ಯಾರಕೆ
ಉದುರಿದ ಮಲ್ಲಿಗೆ ಹೂವು
ಒಣಗಿದರೇನಂತೆ
ಎನ್ನ ಹೃದಯದಿ
ಇನ್ನೂ ಹಸನಾಗಿದೆ
ಪ್ರೇಮದ ಸುವಾಸನೆಯ
ಹರಿಸುತ ಅನವರತ

ಹದಿಹರಯದ ವಯಸು

ಹದಿಹರಯದ ವಯಸು

ಪೊರೆ ಕಳಚಿದ

ಹಾವಿನಂತೆ ಚುರುಕು

ಮೈ ಮನದಲ್ಲಿ

ಕಾಮನೆಗಳ ಘೋರ

ಪ್ರವಾಹ

ಅತ್ತಿತ್ತ ಎತ್ತಲೋ

ಸುಳಿದಾಡುವ

ಸುಂಟರಗಾಳಿಯ ಮನಸು

ಹೂವನರಸುವ ದುಂಬಿಯಂತೆ

ಸೃಷ್ಟಿಯ ಸೌಂದರ್ಯವನೆಲ್ಲ

ಬೇಟೆಯಾಡುವ ಹಸಿದ ಕಂಗಳು

ಸುತ್ತಿ-ಸುತ್ತಿ

ಮಧುವ ಹೀರುವ ಬಯಕೆಗಳು

ಈಗ ಇಲ್ಲಿಯೇ

ಎನ್ನುವಷ್ಟರಲ್ಲಿ

ಎಲ್ಲೆಲ್ಲಿಗೋ ಪಯಣಿಸುವ

ಹುಚ್ಚು ಮನಸು

ಅಲ್ಲಿ ಏಕೆ ? ಇದು ಬೇಡ

ಯಾವುದೂ ಅರಿಯದು

ಅದು ಬೇಕು, ಇದೂ ಬೇಕು

ಬಯಕೆಗಳ ಮಹಾಪೂರ

ಅವರಿವರು ಹೇಳುವ

ಹಿತ ನುಡಿಗಳು

ಕರ್ಣಕಠೋರ, ಕರ್ಕಶ

ಕೇಳುವುದಕ್ಕಿಲ್ಲ ವ್ಯವಧಾನ

ಅಂಬಿಗನಿಲ್ಲದ ನಾವೆಯಂತೆ

ದಶದಿಕ್ಕುಗಳಿಗೂ

ಕ್ಷಣಮಾತ್ರದಲ್ಲಿ ಹರಿಯುವುದು

ಅದು ಹದಿಹರಯದ ವಯಸು

ಕಾಮನೆಗಳ ಸುಳಿಯಲ್ಲಿ

ದಪ್ಪ ಜಡೆ
ಸಣ್ಣ ನಡು
ಬಳುಕುವ ಸೊಂಟ
ಕಂಡೊಡನೆ
ಮನದಲ್ಲಿ ಕಾಮನೆಗಳು
ಭುಗಿಲೇಳುತ್ತವೆ.

ವಯ್ಯಾರಿಯ
ಕುಡಿನೋಟಕೆ
ತುಂಟ ನಗುವಿಗೆ
ಬಿಂಕದ ಮಾತುಗಳಿಗೆ
ಮನಸು
ಹಪಹಪಿಸುತ್ತದೆ

ಜೀವನದಲ್ಲಿ
ಹಲವು ವಸಂತಗಳು
ಕಳೆದರೂ
ಮನದಲ್ಲಿ ತಲ್ಲಣ
ಕಾಮನೆಗಳ
ಕೋಲಾಹಲ

ಅಂತರಂಗದ

ಕಾಮನೆಗಳನ್ನೆಲ್ಲಾ ಕರಗಿಸಿ
ಕಾಲ್ಮರಿಗೆಯಾಗಿ ಧರಿಸಿ
ಜೀವನವನ್ನು
ಮೆಟ್ಟಿ ನಿಲ್ಲುವ ಗಟ್ಟಿತನ
ಎಂದು ಬರುವುದೋ
ಯಾರಿಗೆ ಗೊತ್ತು !!!!

ಹೊಸತು !!!

ಅನುದಿನವೂ ಮೂಡಣದಿ
ಅದೇ ಸೂರ್ಯ
ನಡೆದಾಡಲು ನಮಗೆ
ಅದೇ ಭೂಮಿ

ಹೊಸತನ್ನು ಹುಡುಕುವ
ಹುಮ್ಮಸ್ಸು, ಹಂಬಲ ಅಪಾರ
ಮನಸು ತೆರೆದುಕೊಳ್ಳುವುದಿಲ್ಲ

ಬೆಳಕಿನೆಡೆಗೆ

ಹೀಗಾಗಬಾರದಿತ್ತು

ಅದನ್ನು ಹೀಗೆ ಮಾಡಿದ್ದರೆ

ಚೆನ್ನಾಗಿತ್ತು

ಮನದಲ್ಲಿ ನೂರು ಹಳಹಳಿ

ಇದೊಂದು ಸಲ ಹೀಗೆಯೇ

ಎಂದಿನಂತಿರಲಿ

ಹೊಸತನ್ನು ಮುಂದೆ ಮಾಡೋಣ

ಹಳತು ನಮ್ಮನ್ನು ಅಗಲದು

ಅಪ್ಪಿಕೊಂಡಿದ್ದೇವೆ ಹೆಮ್ಮೆಯಿಂದ

ನಮ್ಮ ಅವಗುಣಗಳನ್ನು

ಮನಸು ಒಪ್ಪುವುದಿಲ್ಲ

ಹೊಸತಿನ ಸ್ನೇಹ, ವಯ್ಯಾರವನ್ನು

ನಾಳೆಯೆಂಬ ಅಭಯ

ಬೆನ್ನ ಹಿಂದಿರುವಾಗ

ಇಂದಿನ ಹೆಜ್ಜೆ

ಹೊಸತಿನೊಂದಿಗೆ ಸಾಗುವುದೇ ಇಲ್ಲ