ಸಖೀಗೀತ

ಸಖೀ....
ಅದೇ ಕಲ್ಲುಬಂಡೆ
ಅಂದು ನಾವಿಬ್ಬರೂ...
ಕುಳಿತು ನಮ್ಮ ಜೀವನದ
ಕನಸುಗಳ ಕಟ್ಟಿದ್ದು
ತಂಗಾಳಿಯಲ್ಲಿ ತೇಲಿಹೋಗಿ
ಮೇಘಗಳ ನಡುವೆ ಮನೆಮಾಡಿದ್ದು

ಸುತ್ತಲೂ ಚೆಲ್ಲಿದ ಹಸಿರು
ಮೊಳಕೆಯೊಡೆದಿಹ ಪ್ರೀತಿಯಿಂದ
ನಮ್ಮ ಬಾಳು ಬಸಿರು ಕಟ್ಟಿದ್ದು
ಪಿಸುಮಾತಿನಲ್ಲಿ ನೀನು
ಅಂದು ಉಸಿರಿದ ಪ್ರೇಮಮಂತ್ರ
ಇಂದಿಗೂ ಕಿವಿಯಲ್ಲಿ ಮೊಳಗುತ್ತಿದೆ


ಬೆಟ್ಟದ ತುದಿಯ
ಬೋಳು ಬಂಡೆಯ ಮೇಲೆ
ಪ್ರೀತಿಯನೇ ಉಸಿರಾಡುತ್ತ ಕುಳಿತ ನಾವು
ಜಗವನ್ನೇ ಗೆದ್ದ ಸಂಭ್ರಮದಲ್ಲಿ
ಮನದಲ್ಲಿಯೇ ಕಟ್ಟಿದೆವು
ನೂರು-ಸಾವಿರ ಕನಸುಗಳ


ನೀನಿಲ್ಲದ ಈ ಸಂಜೆಯಲಿ
ಬೆಟ್ಟದ ತುದಿಯಲ್ಲಿ ನಿಂತು
ನಮ್ಮ ಪ್ರೀತಿಗೆ ಮುನ್ನುಡಿ ಬರೆದ
ಬಂಡೆಯನು ನೋಡುತಿರುವೆ
ಅಂದು ಮನಸಲ್ಲೇ ಚಿತ್ರಿಸಿದ ಜೀವನ
ಇಂದು ಹಸಿರಾಗಿ ಹರಡಿದೆ
ಶಿಲಾಶಾಸನವನ್ನೂ ಮೀರಿ
ಅಜರಾಮರವಾಗಿ ನಿಂತಿದೆ ನಮ್ಮ ಪ್ರೀತಿ.....