ಅರಿವು - ಇರುವೆ

ಕರಿ ಇರುವೆಯೊಂದನ್ನು
ಶಾಯಿ ದೌತಿಯಲ್ಲಿ ಅದ್ದಿ
ಕಾಗದದ ಮೇಲೆ
ಹರಿಯಬಿಟ್ಟರೆ
ಮೂಡುವ ಚಿತ್ತಾರದಂತೆ
ನನ್ನ ಕೈಬರಹ
ಗೊತ್ತು-ಗುರಿಯಿಲ್ಲದೇ
ಸಾಗುತ್ತದೆ ಮನಬಯಸಿದಂತೆ


ಅರ್ಥ ಬರುವಂತೆ
ಭಾವನೆಗಳನ್ನು ಪೋಣಿಸಿ
ಒಪ್ಪವಾಗಿ ಜೋಡಿಸಿದ ಪದಗಳು
ಸಕ್ಕರೆಯ ಹರಳನ್ನು
ಹೊತ್ತು ಸಂತಸದಿಂದ
ಸಾಗುತ್ತಿರುವ ಇರುವೆಗಳಂತೆ
ಮಧುರ ಕಾವ್ಯದ ತೆರದಿ


ಒಮ್ಮೊಮ್ಮೆ
ಪದಗಳ ಮೋಡಿಯಲಿ
ಭಾವನೆಗಳು ಸೋರಿ
ಸುಮ್ಮನೇ ಪೋಣಿಸಿ
ಗಂಟು ಹಾಕದಿರುವ
ಮುತ್ತಿನ ಸರದಂತೆ ಕೆಲವು
ಸಾರಹೀನ ಕವಿತೆಗಳ ವ್ಯಥೆಯೂ


ನಾನೂ ಕಲಿಯಬೇಕು
ತನ್ನ ಅನ್ನವನ್ನು, ತನ್ನದೇ
ಬದುಕಿನ ಭಾರವನ್ನು
ಹೊತ್ತು ಸಾಗುವ ಇರುವೆಯ
ಗುಣಗಳನು
ಎಲ್ಲರೊಡನೊಂದಾಗಿ
ಸಾಲು-ಸಾಲಾಗಿ ಸಾಗುತ್ತ
ದೊರೆತಿರುವ ಅನ್ನವನು
ತಮ್ಮವರೆಲ್ಲರೊಂದಿಗೆ
ಹಂಚಿ ತಿನ್ನುವ ಹಿರಿಮೆಯನು