ನಾಗರೀಕತೆ

ದೂರ ಬೆಟ್ಟದಾಚೆ
ನದಿ ತೀರದಲ್ಲಿ
ಮಂಜು ಮುಸುಕಿದ ಹಾದಿಯಲ್ಲಿ
ಕಂಡೂ ಕಾಣದಂತಿರುವ
ಗೋಪುರದ ಬೀದಿಯಲಿ
ಎಡಬದಿಯ ಮೂರನೇ ಗುಡಿಸಲು
ನಮ್ಮದಾಗಿತ್ತು


ಹಸಿರು ತುಂಬಿದ ಸಹ್ಯಾದ್ರಿ ಸಾಲಿನ
ಮಂಜು ಮುಸುಕಿದ ಹಾದಿಯಲಿ
ಹರಿವ ನೀರಿನ ಜುಳು ಜುಳು ಸದ್ದು
ನದಿ ತೀರದ ಮರಳಿನಲ್ಲಿ
ಅಳಿಸಿ ಹೋದ ಆ ನೂರು ಹೆಜ್ಜೆಗಳು
ಗತಕಾಲದ ಹರಿರುಹೊನ್ನಿಗೆ
ಮೂಕ ಸಾಕ್ಷಿಯಾಗಿವೆ


ನಾಗರೀಕತೆ ಬೆಳೆದಿದೆ ಇಂದು
ಕೆಂಪು ಮಣ್ಣಿನ ಹಾದಿಯಲಿ
ಹಸಿರೆಲ್ಲ ಕಳೆದುಹೋಗಿದೆ
ಗುಡಿಸಲು ಕಾಣೆಯಾಗಿದೆ, ಹೆಂಚಿನ ಮನೆಯೂ
ಕಾಂಕ್ರೀಟು ಕಾಲಿಟ್ಟಿದೆ ಈಗ
ಠೀವಿಯಿಂದ ಮನೆ ಮನೆಯಲ್ಲಿಯೂ ಕಾಲಿಟ್ಟಿದೆ ಟಿವಿ


ಬೆಟ್ಟಗಳ ಬಗೆದು, ಗುಂಡಿಗಳ ತೋಡಿ
ನಾಡ ಸಿರಿಯೆಲ್ಲ ಲೂಟಿಯಾಗಿದೆ
ತೇಗ, ಹೊನ್ನಿ, ಮತ್ತಿ ಶ್ರೀಗಂಧ ಮರಗಳು
ಕಾಣೆಯಾಗಿವೆ ಮಾನವನ ದುರಾಸೆಗೆ
ಕಾಡು ಕಾಣದಾಗಿದೆ
ಕುರುಚಲು ಗಿಡ-ಮರಗಳ ಮಧ್ಯೆ