ದೀವಿಗೆ

ಸಾಗುವುದೇ ಜೀವನ
ನಿಲ್ಲದು ಕಾಲನ ಗಣನೆ
ಕವಲು ದಾರಿಯಲಿ ಮುನ್ನಡೆಯಲು

ದಾರಿ ತೋರುವ ದೀವಿಗೆಯು ಬೇಕು
ಬದುಕಿನ ಬವಣೆಯಲಿ ಕಂಗೆಟ್ಟು ನಿಂತಾಗ
ಬೆಳಕು ಚೆಲ್ಲಿ ಮುನ್ನಡೆಸುವ ಮನಸು ಬೇಕು


ಕುರುಡ ಕಂದೀಲು ಹಿಡಿದು
ಸಾಗುವುದು ದಾರಿ ಅರಿಯಲಲ್ಲ
ದಾರಿಹೋಕರು ಹಾಯದಂತಿರಲು
ಕಣ್ಣು ತೆರೆಸುವುದು ನಮಗೆ
ಕುರುಡನಾ ಕಂದೀಲು
ಮುಂದೆ ಸಾಗುವ ಮುನ್ನ.....

ಸಖೀ ಗೀತ

ಸಖೀ....

ಕಾಲಾತೀತವಾದ
ದಾಹವನು
ಆಪೋಶನಗೊಳಿಸಿಕೊಂಡು
ಹನಿ ಪ್ರೀತಿಗೆ ಬಾಯ್ದೆರೆದು
ಕಾದು ಕುಳಿತಿರುವ
ಎನ್ನ ಹೃದಯಕೆ
ಪ್ರೇಮ ಸಿಂಚನಗೈದು
ನೀನು ಎರಚಿದ
ಆ ಪ್ರೇಮ ಬೀಜ
ಮೊಳಕೆಯೊಡೆದು, ಬಳ್ಳಿಯಾಗಿ
ಅಂತರಾಳದಲಿ ಹಸಿರಾಗಿ
ಎನ್ನ ಜೀವನದ
ಜೀವನಾಡಿಯಾಗಿ
ಚಿಗುರೊಡೆದು, ಮುಡಿಯಲೊಂದು
ಹೂವ ಅರಳಿಸಿ ನಲಿಯುತಿದೆ......

ಸಖೀ ಗೀತ

ಸಖೀ....

ಹಣತೆಯಾಗುವಾಸೆ ಎನಗೆ
ನಿನ್ನ ಹೃಯಮಂದಿರದ
ಮೂಲೆಯಲ್ಲಿ ಕುಳಿತು
ಪ್ರೀತಿಯ ಬೆಳಕ ಚೆಲ್ಲುವಾಸೆ

ಎನ್ನ ಜೀವನವನ್ನೇ
ಬತ್ತಿಯಾಗಿ ಹೊಸೆದು
ನಿನ್ನ ಅಂತರಂಗಲಿ ಪ್ರತಿಫಲಿಸುವ
ಪ್ರೀತಿಯ ಎಣ್ಣೆಯನು ಮಿಂದು
ಜೀವನದಿ ಬಾಳು ಬೆಳಗುವಾಸೆ... :)

ಸಖೀ ಗೀತ

ಸಖೀ....

ಹೀಗೆ ಮುನಿಸಿಕೊಂಡು
ಹೋಗದಿರು
ನಿನ್ನ ಹಿಂದೆಯೇ ಬರುತಿದೆ
ಎನ್ನ ಹೃದಯವೂ


ನಿನ್ನ ಅಗಲಿಕೆಯ
ಭಾವವ ಧರಿಸಿ
ಪೇಲವಗೊಂಡ ಮುಖದಲ್ಲಿ
ಹನಿಜೀವ ಹಿಡಿದು
ನೋಡುತ್ತಿರುವ ಕಂಗಳಲಿ
ಕಣ್ಣಿಟ್ಟು ನೋಡು

ಹೋಗದಿರು ಸಖೀ
ಮರಳಿ ಬಾ ಎನ್ನೆಡೆಗೆ
ವಿರಹದುರಿಯಿಂದ ಬೆಂದು
ಬಸವಳಿದಿಹ ಹೃದಯಕೆ
ನಿನ್ನ ಪ್ರೇಮಾಮೃತವ ಬಡಿಸು.....